Jinoyatga suiqasd qilishning subyektiv tomoni

Mazkur maqolada jinoyatga suiqasd qilish, uning subyektiv belgilari yuridik fanda mavjud bo‘lgan konseptual yondashuvlar, ilmiy-nazariy qarashlar va sud amaliyoti materiallari asosida tahlil qilingan. Egri qasddan va ehtiyotsizlikdan sodir etiladigan jinoyatlarga suiqasd qilish mumkin emasligi muallif tomonidan ishlab chiqilgan tavsiyalar asosida isbotlangan. Aybdor shaxs o‘z qilmishining ijtimoiy xavflilik xususiyatini anglashi, ijtimoiy xavfli oqibatlarga ko‘zi yetishi va shunday oqibatlar kelib chiqishini istashi tufayli jinoyatga suiqasd qilish faqat to‘g‘ri qasd orqali ifodalanishi asoslantirilgan. Shuningdek, kuchli ruhiy hayajonlanish holatida qasddan odam o‘ldirish (JK 98-moddasi), zaruriy mudofaa chegarasidan chetga chiqib qasddan odam o‘ldirish (JK 100-moddasi) kabi subyektiv tomonining o‘ziga xos jinoyatlariga suiqasd qilish masalasi ilmiy qarashlar va sud hukmi tahlili asosida tadqiq etilgan. Shu bilan birga, jinoyatga suiqasd qilish subyektiv tomonining motiv, maqsad va emotsiya kabi belgilari, JK Maxsus qismida mazkur belgilar nazarda tutilgan hollarda, albatta, sodir etilgan qilmishda mazkur belgilarni aniqlash zarurligi o‘rganilgan. Tadqiqot natijalariga ko‘ra, jinoyatga suiqasd qilish faqat to‘g‘ri qasddan sodir etilishi masalasida amaldagi jinoyat qonunchiligiga o‘zgartirish kiritish zarurati keltirilgan.