Konstitutsiyaviy normalarning jinoyat qonunchiligi prinsiplari sifatida aks ettirilishi

Davlatning yagona huquq tizimi Konstitutsiyaga asoslanadi va unga bo‘ysunadi. Konstitutsiyadagi normalar boshqa huquq sohalarida ushbu sohani tartibga solish predmetidan kelib chiqqan holda o‘z aksini topadi. Shu jumladan, jinoyat huquqi ham Konstitutsiya normalariga asoslanadi. Konstitutsiya jinoyat huquqi normalariga hal qiluvchi ta’sir ko‘rsatib, ularning shaxs, jamiyat va davlat manfaatlarini himoya qilishga qaratilganligini belgilaydi va shu orqali barcha jinoyat qonunchiligining ijtimoiy mazmunini belgilaydi. O‘zbekiston Respublikasi Konstitutsiyasi oliy yuridik kuchga ega ekanligi, O‘zbekiston Respublikasida qabul qilingan qonunlar va boshqa huquqiy hujjatlar Konstitutsiya normalari va tamoyillariga zid bo‘lmasligi kerakligi to‘g‘risidagi qoidalar jinoyat huquqi uchun nihoyatda muhim tartibga solish vazifasini bajaradi. Konstitutsiya davlatning ijtimoiy-iqtisodiy tuzilishining xususiyatlarini belgilab beradi, jinoyat huquqi tamoyillari esa konstitutsiyaviy qoidalarga asoslanadi. Maqolada jinoyat huquqi prinsiplarining jinoyat qonunchiligida aks ettirilishi masalalari tadqiq etilgan. Xorijiy mamlakatlar tajribasi asosida jinoyat qonuni prinsiplari va jinoiy javobgarlik prinsiplari tushunchalari o‘rtasidagi farq tushuntirib berilgan. Muallif tomonidan jinoyat qonunchiligi prinsiplari mazmuni alohida normalarda ochib berilishi maqsadga muvofiqligi asoslantirilgan. Jinoyat kodeksida prinsiplar mazmunini belgilashga oid takliflar ilgari surilgan.