Ma’muriy sudlarda ma’muriy-huquqiy normalarni qo‘llashga oid muammolarning ilmiy-amaliy tahlili

Ma’muriy odil sudlovning O‘zbekistonda kelib chiqishi va rivojining ilmiy-amaliy yutuqlarini e’tirof etgan holda mazkur maqolada bugungi kunda sud amaliyotida uchrayotgan ma’muriy huquq normalari va fuqarolik huquqi normalarini ma’muriy ishlarni ko‘rishda qo‘llashga oid bahsli masalalar tahlil qilinadi. Hozirgi kunda fuqarolik qonun hujjatlarining yer bilan bog‘liq ma’muriy nizolarni ko‘rishda qo‘llanish holatlari mavjudligini ko‘rish mumkin. Maqolada ma’muriy sud amaliyotidagi amaliy misol tahlili keltirilgan. O‘zbekiston Respublikasi Yer kodeksi va “Ma’muriy tartibtaomillar to‘g‘risida”gi qonunning ma’muriy aktning kuchga kirishi bilan bog‘liq normalarning o‘zaro nisbati o‘rganilgan. Ma’muriy-huquqiy munosabatda birinchi navbatda Yer kodeksi normasini emas, “Ma’muriy tartib-taomillar to‘g‘risida”gi qonun normalarini qo‘llash lozimligi keltirib o‘tilgan. Ma’muriy huquq normalari fuqarolik huquqining maxsus normalari sifatida qaralishi noto‘g‘riligi asoslab berilgan. Sud amaliyotida uchrayotgan ayrim muammoli masalalar yuzasidan ilmiy asoslantirilgan yechimlar taklif etilgan. Ma’muriy sudlar mamlakatimizda nisbatan yangi hisoblangani bois fuqarolik huquqi normalarini ma’muriy huquq normalariga aralashtirish yoki fuqarolik huquqi normalari bilan ma’muriyhuquqiy munosabatlarni tartibga solish kerak emas.