Mehnat munosabatlarida gender tenglikni ta’minlashning huquqiy muammolari

Dissertatsiya mavzusining dolzarbligi va zarurati.
Dunyoda mehnat munosabatlarida gender tenglikni ta’minlash hamon dolzarb muammolardan biri bo‘lib qolmoqda. Mehnat munosabatlarida gender tenglikni ta’minlash inson huquqlarining, ijtimoiy adolatning va iqtisodiy samaradorlikni oshirishning ajralmas qismi hisoblanadi. Xalqaro mehnat tashkiloti ma’lumotlariga ko‘ra, “ayollar erkaklarga nisbatan o‘rtacha 20% kam ish haqi oladi”, bu esa mehnat sohasidagi gender tengsizlikning jiddiy oqibatlaridan dalolat beradi. Gender tenglikni ta’minlashga qaratilgan xalqaro darajada qabul qilingan huquqiy hujjatlar va tavsiyalarga qaramasdan, ushbu masalaning milliy darajada amalga oshirilishi har bir mamlakatning ijtimoiy, iqtisodiy va huquqiy sharoitlariga bog‘liq bo‘lib qolmoqda. Shu munosabat bilan ko‘plab mamlakatlarda mehnat munosabatlarida gender tenglikni ta’minlash muammolarini o‘rganish zarurati mavjud.